Koffer in Berlyn essays oor kabaret Hennie Aucamp

Is kabaret aan't anders word? Kan wat vandag deurgaan as kabaret die toets met die verlede deurstaan? Veral in Suid-Afrika, waar soms baie slordig omgegaan word met die woord 'kabaret'. Kabaret, daardie intieme kultuuruiting, opgevoer voor 'n klein gehoor in 'n beperkte ruimte, is nie meer die reël nie. - Hennie Aucamp in 'n onderhoud op LitNet.

Na aanleiding van hierdie vrae het Hennie Aucamp sy bundel essays oor die kabaret, Koffer in Berlyn saamgestel. In Koffer in Berlyn ontleed Aucamp die talle fasette van kabaret: die integrasie tussen beeld, musiek en woord - met 'n tema en struktuur waarin ironie sentraal staan. Lesings, resensies, koerant- en tydskrifartikels en ander letterkundige bydraes, sowel as uittreksels van sommige van Aucamp se kabarette word in Koffer in Berlyn byeengebring. Aucamp bespreek kabaret wat internasionaal gebesig is en laat die soeklig ook op die plaaslike toneel val. Met Koffer in Berlyn vul Hennie Aucamp nog 'n leemte in die Afrikaanse letterkunde.